چارواکي: نړۍ دې د اقلیم بدلون برخه کې د بشریت ژغورلو هڅه وکړي

د لوړو زده کړو وزارت علمي مرستیال په ننګرهار پوهنتون کې د اقليمي بدلون نړیوال کنفرانس د پیل پر مهال ویلي، چې نړۍ دې د اقلیمي بدلون په برخه کې شکلي تعامل نه، بلکې د بشریت د ژغورلو لپاره هڅه وکړي. نوموړي زیاته کړې، چې د اقلیمي بدلون په برخه کې به له افغانستان سره د نړۍ له لوري د شوي ظلم پر وړاندې خپل غږ پورته کړي او د هېواد د موسمونو، سیندونو او اوبو د یرغل پر وړاندې به په کلکه ودرېږي. نوموړي ټینګار کړی، چې داقلیمي بدلون په برخه کې به وعدې تر سرحده نه، بلکې د عمل ترسرحده کار وکړي، ځکه د اقلیمي بدلون په اړه ورته د افغانستان قضیه ارزښت لري. عملي مرستیال په خپلو خبرو کې راتلونکی کال په کابل پوهنتون کې د زرغون انقلاب، په پولي تخنیک پوهنتون کې د اوبو او په بدخشان کې د ګرځندویي صنعت په اړه د نړیوالو کنفرانسو د جوړېدو خبر ورکړی.