چارواکي: په ټولو پروژو کې له خپلو کدرونو د ګټې اخیستنې هوډ لرو

د سرپرست حکومت سیاسي مرستیال د کابل پولي تخنیک پوهنتون کې د زده کړیالانو فراغت غونډه کې ویلي، سرپرست حکومت مسلکي کدرونو ته اړتیا لري، د خدمت زمینه ورته برابروي او ملاتړ یې کوي. نوموړي زیاته کړې، سرپرست حکومت په ټولو پروژو کې له خپلو کدرونو څخه د ګټې اخیستنې هوډ لري. نوموړي له تازه فارغو زدکړیالانو نه غوښتي، چې د هېواد په ابادۍ کې پوره ونډه واخلي. د کابل پولي تخنیک پوهنتون په دې دوره کې له انجنیري پوهنځۍ څخه ۷۵۹ تنه انجنیران فارغ شول، چې ۲۲۲ تنه یې ماسټري او پاتې نورو یې د لیسانس په کچه د فراغت سندونه ترلاسه کړل.