چین له افغان زلزله ځپلو سره تازه مرسته وکړه

د چین اېم سي سي ‌ډلې افغانستان کې له زلزله ځپلو کورنیو سره مرسته وکړه او د افغانستان سرپرست حکومت ته یې وسپارله. په يادو مراسمو کې د چین سفیر وانګ یو، د افغانستان د کانونو او پيټروليم وزارت سرپرست شهاب الدين دلاور او د طبيعي پېښو پر وړاندې د مبارزې وزارت سرپرست مرستیال مولوي شرف الدين مسلم ګډون کړی و.  سفیر وانګ یو په خپلو خبرو کې وویل، چې چین د افغانانو ستونزو ته جدي پاملرنه کوي او خپلې مرستې یې نه دي سپمولي. د چین اېم سي سي ډلې د ۲۰۰ زرو ډالرو په ارزښت له زلزله ځپلو افغانانو سره مرسته کړې، چې پکې اوړه، وريجې، غوړي او نغدي پيسې شاملې دي. نوموړي زیاته کړې، چې چین به د خوړو، طبي درملو او د طبيعي پېښو پر وړاندې د مبارزې په برخه کې له افغانستان سره دوامدارې مرستې وکړي.