ډاکتر نعیم: کندهار کې زرګونو کسانو د ا.ا د لوی مشر په امامت د اختر لمونځ ادا کړ

په داسې حال کې چې د افغانستان ا.ا لوی مشر شیخ هبت الله اخندزاده تر اوسه پورې چا نه دی لیدلی او ډېری خلک وایي، غواړي چې نوموړی وویني خو هغه تر اوسه پورې نه پر تلویزیون راڅرګند شوی دی او نه یې هم له راډیو تر اوسه پورې غږ اورېدل شوی دی. نن د ا.ا د قطر دفتر ویاند ډاکتر محمد نعیم پر خپل ټویټر د ګڼو خلکو له یو انځور سره لیکلي چې په کندهار کې زرګونو کسانو د ا.ا د لوی مشر شیخ الحدیث هبت الله اخندزاده په امامت د اختر لمونځ ادا کړی دی. په عکس کې یوازې زرګونه کسان ښکاري خو د لوی مشر درک پکې نشته دی. که څه هم یو شمېر خلک د نوموړي د شتون په اړه اندېښنه څرګندوي خو د ا.ا چارواکي وایي چې نوموړی به په مناسب وخت کې ټولو هېوادوالو ته راڅرګند شي.