ډبلیو ایچ او: کونړ کې د زلزلې له اغېزمنو کورنیو خپل ملاتړ ته دوام ورکوي

په افغانستان کې د روغتیا نړیوال سازمان ( ډبلیو ایچ او) پر خپله اېکس پاڼه لیکلي، چې دا بنسټ په کونړ کې د وروستۍ زلزلې له اغېزمنو کورنیو خپل ملاتړ ته دوام ورکوي. د روغتیا نړیوال سازمان استازی ادوین سنیزا سالوادور د ملګرو ملتونو له یوه جګپوړي پلاوي سره د دغه ولایت اندرلاچک کلي ته تللی او د زلزله‌ځپلو اړتیاوې یې ارزولې دي. سالوادور ټينګار کړی: «زموږ لومړیتوب دا دی چې هره ځپل شوې کورنۍ باید بېړنیو روغتیايي خدماتو ته لاسرسی ولري. د روغتیا نړیوال سازمان به د افغانانو ترڅنګ پاتې شي څو ژوند یې بېرته ورغېږي.» دا په داسې حال کې ده چې د اندونیزیا د بیړنیو روغتیايي مرستو او ژغورنې کمیټې مشر هیدیکي حبیب ویلي چې زلزلې په افغانستان کې جدي روغتیايي او ټولنیزې اغیزې لرلې دي، خو د ځپل شویو لپاره نړیوال بشري ملاتړ بسنه نه کوي.