کابل پوهنتون: اوسنی رییس سرپرست دی، د ادلون بدلون امکان شته

کابل پوهنتون په یوه رسمي اعلامیه کې ویلي چې ددې پوهنتون د ریاست لپاره محمد اشرف غیرت د سرپرست په توګه معرفي شوی دی. دغه پوهنتون په ټولنیزو رسنیو کې د نوي رییس د ټاکل کېدو په اړه د غبرګونو په ځواب کې ویلي، چې د کابل پوهنتون مخکینی رییس پوهاند دوکتور محمد عثمان بابري په یوه علمي سفر آلمان ته روان دی نو د پوهنتون د چارو د مخ ته بېولو لپاره محمد اشرف غیرت ددغه پوهنتون د سرپرست په توګه معرفي شوی دی. سرچینه کاږي چې محمد اشرف غیرت د ا.ا.ا د تحصیلاتو په کمیسیون کې کار کړی دی پوره تجربه لري او اوسنۍ دنده یې هم د ریاست سرپرستي ده، چې وخت او اړتیا ته په کتو په دې ټاکنه کې بدلونونه راتللی شي. کابل پوهنتون وروسته له دې پر یاده مسئله غبرګون ښودلی چې په ټولنیزو رسنیو کې د کابل پوهنتون د ریاست لپاره د ښاغلي اشرف ټاکل کېدو توند غبرګونونه پارولي دي. کاروونکي وايي چې کابل پوهنتون تر اته سووه ډېر استادان لري چې لوړې علمي رتبې او زده کړې لري او باید د یاد پوهنتون د ریاست لپاره ترې یو کس غوره کړل شي.