کاپيسا کې دوه زره کلنه ډبرینه مجسمه موندل شوې

په کاپیسا ولایت کې یوه لرغونې ډبرینه مجسمه کشف او د دغه ولایت د اطلاعاتو او کلتور ریاست ته سپارل شوې ده. د کاپیسا د اطلاعاتو او کلتور ریاست د ګرځندوی امر نصرت‌الله سنجني ویلي، چې یاده مجسمه د مرکز محمودراقي اړوند د دویمې امنیتي حوزې په «کره ‌تاز» کلي کې د یوه استوګنیز کور څخه د امنیتي ځواکونو د هڅو په پایله کې ترلاسه شوې ده. نوموړي زیاته کړې، چې دغه مجسمه د بودایي دورې پورې اړه لري او لوړ تاریخي ارزښت لري. د هغه په وینا، یاد لرغونی اثر دا مهال په محلي موزیم کې د ساتنې لاندې دی، څو د کاپیسا د کلتوري میراث د یوې برخې په توګه خوندي وساتل شي او د تاریخي څېړنو لپاره ترې ګټه واخیستل شي.