ارګ د سولې لپاره د ولسمشر غني طرحه خپره کړې ده

ولسمشر په دې طرحه کې د تېر په څېر یو ځل بیا ټینګار کړی چې دی او مرستیالان یې په هېڅ وجه تر خپلې ټاکلې نېټې مخکې د واک پرېښودو ته تیار نه دي خو بیا یې هم ویلي چې تر وخت مخکې ټاکنې ورته د منلو وړ دي. هغه ویلي که یې مخالفین دی نه غواړي نو په ټاکنو کې به نوماند نه شي، خو په هېڅ زور او فشار به واک له غیر قانوني لارو خپلو مخالفینو ته پرې نه ږدي. ولسمشر غني همدا راز ویلي چې په اساسي قانون کې تعدیل د ولس خوښه ده او تر هغه چې تعدیلات راځي همدا اوسنی قانون باید عملي کړل شي. نوموړي د لویې جرګې پر رابللو هم ټینګار وکړ او زیاته یې کړه چې لویه جرګه د افغانانو د پرېکړو محضر دی او د سولې اړوند ټولې پرېکړې به د لویې جرګې له لارې کېږي. ولسمشر ویلي دوی د سولې غوښتونکي دي، خو هغه سوله چې دلته د دایمي ثبات، امنیت او پرمختګ سبب شي.