ازبکستان له افغاني لوري سره د ټرانس پروژې په تړاو خبرې کړې

د ازبکستان د ټرانسپورټ وزیر د سرپرست حکومت د ټرانسپورټ او هوايي چلند له سرپرست وزیر سره په کتنه کې د ټرانس افغان پروژې د چارو د چټکتیا غوښتنه کړې ده. د  ازبکستاني رسنیو د راپورونو له مخې نن د دغه هېواد د ټرانسپورټ وزیر الهام محکم اوف له خپل افغان سیال سره په تاشکند کې د افغانستان له لارې د پاکستان سره د ازبکستان د رېل لارې د وصلېدو پر لارو چارو او نورو دوه اړخیزو همکاریو خبرې کړې دي. د ۲۰۲۱ په فبرورۍ کې افغانستان، ازبکستان او پاکستان له مزارشریف څخه د پاکستان تر پولې د رېللارې د جوړېدو موافقه وکړه، خو د جمهوري حکومت له پرځېدو وروسته دا پروژه د څه مودې لپاره هېره شوه. روان کال بیا د افغانستان سرپرست حکومت له پاکستان او ازبکستان سره د دې پروژې د پیلېدو په اړه له سره خبرې کړې دي. یاده رېل لاره چې ۵۷۳ کیلومتره اوږدوالی لري، په جوړېدو سره یې څه باندې څلورنیم میلیارد ډالره لګښت راځي، خو تراوسه پورې هیڅ پانګوونکی نه دی حاضر شوی، چې په دې پروژه کې پانګونه وکړي. بلخوا ازبکستان بیا له قطر څخه غوښتي چې په ترانس افغان پروژې کې پانګونه وکړي.