اسټین: له افغانستانه د ځواکونو په ایستلو پښېمانه نه یو

د امریکا د دفاع وزیر لویډ اسټین دکانګرس غړو ته ویلي چې دوی له افغانستان څخه په ناببره توګه د ځواکونو دایستلو له پروسې پښېمانه نه دي. نوموړی پرون د امریکا استازو جرګې د پوځي خدمتونو کمېټې د جمهوري غوښتونکو غړو له لوري وربلل شوی و، د نورو پوښتنو تر څنګ له افغانستانه د امریکايي ځواکونو کاواکه وتل هم ډېرو استازو ته مهمه پوښتنه وه. د ۲۰۲۱ کال په اګست کې له افغانستانه د امریکایي ځواکونو ناببره او په بېړه وتلو له کبله د ولسمشر جوبایډن اداره په امریکا او له امریکا بهر له پراخو نیوکو سره مخ ده. د ځواکونو د وتلو پر مهال تر ټولو لویه پېښه چې امریکایان یې سپیناوی غواړي د هغه برید موضوع ده چې د کابل نړیوال هوایي ډګر کې وشو او په پایله کې یې ۱۳ امریکايي سرتیري او نږدې ۱۷۰ولسي افغانان ووژل شول. پرون د امریکا استازو جرګې د پوځي خدمتونو کمېټې، جمهوري غوښتونکو غړو دفاع وزیر لوید استین په سختو پوښتنو وننګوه.