افغانستان او قزاقستان ګډه سوداګریزه خونه جوړوي

سوداګرۍ وزارت وایي چې افغانستان او قزاقستان د یوې ګډې سوداګریزې خونې پر جوړولو کار کوي. یاد وزارت زیاته کړې ده چې دا مسئله د افغانستان او قزاقستان د سوداګرۍ وزیرانو ترمنځ په یوه لیدنه کې یاده شوې ده او دواړو لوریو پر دوه اړخیزو همکاریو خبرې اترې کړې دي. د صنعت او تجارت وزیر نورالدین عزیزي ویلي چې هیواد یې له قزاقستان سره پراخې تجارتي اړیکي لري. هغه ویلي، که هوايي دهلیزونه جوړ او یو شمیر قزاقستاني بانکونه په افغانستان کې نمایندګۍ پرانیزي نو تجارتي اړیکي به یې نور هم وده وکړي. د سوداګرۍ وزارت په خبره، دوی له قزاقستان د یوې ګډې سوداګریزې خونې پر جوړولو کار کوي. د یادونې ده چې واک ته د ا.ا تر رسېدو وروسته قزاقستان له افغانستان سره د پخوا په پرتله خپلې اړیکې پراخې کړې دي او په وار وار یې د همکاریو ژمنې کړې دي.