افغانستان د م،م د ښځو مقام کمیسیون غړیتوب خپل کړ

افغانستان د لومړي ځل لپاره د ملګرو ملتونو د ښځې مقام د کمیسیون غړیتوب خپل کړی دی. په ملګرو ملتونو کې د افغانستان دایمي استازې عادله راز وایي دا یو مهم نړیوال کمیسیون دی چې افغانستان به یې د څلورو کلونو لپاره غړیتوب ولري. یاد کمیسیون د ښځو د حقونو او جنسیتي تبعیض د له منځه وړلو او همدا راز د مېرمنو د ژوند په ښه کولو او وده کې فعالیت کوي. ددغه کمیسیون د غړیتوب لپاره افغانستان، چین او هند سیالي کوله چې په پایله کې افغانستان د ملګرو ملتونو له غړو هېوادونو ۵۴ رایې خپلې کړې دي او په یاد کمیسیون کې یې څوکۍ خپله کړې ده. عادله راز وایي دوی به په ملګرو ملتونو کې د افغان مېرمنو د ژوند ښه کولو لپاره خپلې مبارزې او هڅې ته ادامه ورکوي.