افغانستان د وژل شویو خبریالانو نوملړ کې دویم ځای لري

۲۰۲۱ کال په نړۍ کې د خبریالانو لپاره یو خونړی کال بلل شوی دی. د رسنیو نړیوال انسټیټیوټ په یوه راپور کې ویل شوي د دې کال په اوږدو کې په ټوله نړۍ کې ۳۵ خبریالان د دوی د فعالیت په تړاو وژل شوي دي، چې د رپوټ په ټکو ثابتوي چې د خبریالانو د ژوند خوندیتوب لا هم په نړیواله کچه یوه ننګونه ده. مکسیکو د دغه لیست په لومړي سر کې راځي چې د تېر کال اوږدو کې ۷ خبریالان په کې په نښه شوي دي. له مکسیکو وروسته افغانستان او هند دواړه په دې لیست کې دویم ځای لري، چې د ای پي ای مسوولینو په وینا په دې هر یوه هېواد کې تېر کال شپږ خبریالان د خپل کار په تړاو وژل شوي دي. په افغانستان کې د ډېری خبریالانو وژنې لامل د جګړې پر مهال له خبریالانو سره تاوتریخوالی بلل شوی دی. د ای پي ای مسوولین وايي، دوی په نړیواله کچه له خبریالانو سره د تاوتریخوالي پېښې پرلپسې څاري او د سږ کال په نښه شویو خبریالانو لیست یې د همدې شمېرو له مخې چمتو کړی دی.