افغانستان کې څه باندې ۱۷ میلیونه کسانو ته برېښنايي پېژندپاڼې وېشل شوي

د احصایې او معلوماتو ملي اداره ویلي، چې د برېښنایي پېژندپاڼو د وېش بهیر له پیله تر اوسه ۱۷ میلیونه او ۶۸ زره هېوادوالو ته برېښنایي پېژندپاڼې وېشل شوي، چې له ډلې یې ۱۰ میلیونه او ۶۲۱ زره نارینه او شپږ میلیونه او ۴۴۷ زره ښځینه وو ته وېشل شوې دي. د ارقامو له مخې تر ټولو ډېرې برېښنایي پېژندپاڼې په کابل، هرات، کندهار، بلخ او ننګرهار ولایتونو کې وېشل شوې دي او څه باندې ۱۱ میلیونه برېښنایي پېژندپاڼې یوازې د ا.ا له بیا واکمنېدو تر اوسه وېشل شوې دي. د یادونې وړ ده، چې اوس مهال د کابل په ګډون په ټول هېواد کې د اسان خدمت او برېښنایي پېژندپاڼو ۸۱ وېش څانګې او په متحده عربي اماراتو کې د اسان خدمت یو مرکز فعال دی، چې هره ورځ ښځینه او نارینه غوښتونکو ته اړوند خدمتونه وړاندې کوي.