د امریکا د بهرنیو چارو وزارت ویلي وو چې پر حکومت او طالبانو د فشار راوستلو لپاره زلمي خلیلزاد نوی سفر پيل کړی دی، چې د هغه تر را رسېدو مخکې افغان حکومت د طالبانو د خطرناکو زندانیانو د خوشي کولو پروسه هم پيل کړې ده. ویل کېږي چې حکومت تازه د خطرناکو بندیانو له ډلې پنځوس یې خوشي کړي دي او طالب سرچینو هم دغه راپور تایید کړی دی. بلخوا طالبان بیا ادعا کوي چې افغان حکومت د خوشي شوو طالبانو پر کورونو چاپې وهي او دوی بېرته نیسي، خو حکومتي چارواکي بیا وایي چې ډېری زندانیان تر خوشې کېدو وروسته بېرته د جګړې ډګر ته ستانه شوي چې ځینې یې آن د جګړې پرمهال نیول شوي دي.
میاشتې کېږي چې د زندانیانو د خلاصون پر سر د اختلاف له امله بین الافغاني خبرې ځنډېدلې دي. افغان حکومت ویلي وو چې د طالبانو څه باندې څلور زره بندیان یې خوشي کړي دي، خو شپږ سوه بندیان یې ځکه نه خوشي کوي چې پر دوی حق العبدي دی. طالبانو بیا ویلي وو چې افغان حکومت په لوی لاس د زندانیانو په خوشي کولو کې خنډونه جوړوي او دا مسئله به ښه پایله ونه لري. بلخوا امریکا هم له دې مسئلې ستړې شوې او په ځلونو یې له طالبانو او افغان حکومت غوښتي چې د زندانیانو د خلاصون لړۍ چټکه کړي.
اوس تازه د امریکا د بهرنیو چارو وزارت ویلي چې د افغان سولې لپاره د امریکا د بهرنیو چارو وزارت ځانګړی استازی زلمی خلیلزاد په سفر تللی دی. د دغه سفر تر ټولو مهمه مسئله پر طالبانو او افغان حکومت فشار راوړل دي، څو دوی د بندیانو د خلاصون لپاره اقدام وکړي. د امریکا د بهرنیو چارو وزارت په اعلامیه کې راغلي: ((خلیلزاد به دوحې او کابل ته ځي څو پر دواړو لورو فشار راولي چې د بندیانو د خوشي کولو لپاره اقدام وکړي او د بین الافغاني خبرو له لار کې شته خنډونه له منځه یوسي)).
خو د خلیلزاد تر را رسېدو مخکې افغان حکوت د طالبانو د خطرناکو بندیانو د خوشي کولو لړۍ پیل کړې ده. د زندانیانو د خلاصون لپاره د طالبانو له لوري موظف پلاوي ویلي چې افغان حکومت وړمه ورځ ناوخته پنځوس طالب بندیان خوشي کړي دي. د دوی په خبره، دا هغه کسان وو چې افغان حکومت خطرناک بللي وو او په وینا یې، د دوی دوسیې پېچلې دي او حق العبد ورباندې دی، خو اوس د دې هر څه پر خلاف افغان حکومت د دوی د خوشي کولو پرېکړه کړې ده. دا چې نور بندیان به هم خوشي کېږي کنه، حکومت یې په اړه څه نه دي ویلي، خو طالبان ټینګار کوي چې د لېست له مخې باید د دوی پنځه زره بندیان خوشي شي.
بلخوا طالبان بیا وایي چې حکومت د زندانیانو د خلاصون په برخه کې خنډونه جوړوي. د وسله والو طالبانو د قطر دفتر ویاند سهیل شاهین پرون د افغان حکومت د وروستیو اقداماتو په غبرګون کې ویلي، حکومتي ځواکونه پر هغو کسانو چاپې وهي چې تازه د حکومت له زندان خوشي شوي دي. د ده په خبره، حکومتي ځواکونه یاد کسان بېرته له ځان سره بیایي چې په دې اړه دوی د ځینو مواردو معلومات هم له ځان سره لري. سهیل شاهین وایي، د حکومت دغه ډول کړنې د بین الافغاني خبرو لپاره خنډ جوړوي او د سولې پروسه له ستونزو سره مخ کوي. شاهین وایي: ((حکومت پر خوشي شوو طالبانو چاپې وهي، دوی ته کمین نیسي، له ځان سره یې بیايي چې دا به خطرناکې پایلې ولري)).
بلخوا طالب سرچینې بیا وایي، د دې تمه لري چې خلیلزاد په دا ځل سفر کې ټول شته خنډونه له منځه یوسي، بین الافغاني خبرو ته لار هواره کړي او د زندانیانو پر خوشي کولو جوړ شوی اختلاف ختم کړي.
خلیلزاد به د دې مواردو تر څنګ په دې سفر کې له پاکستان، ناروې او بلغاریا د لیدنې پرمهال د تاوتریخوالي پر کموالي او د بندیانو تبادلې وروستي پړاو پر بشپړېدو ټینګار وکړي.
