افغان حکومت: نړیوال دې بشري مرستې له سیاسي موضوعاتو سره نه تړي

د ا.ا سرپرست حکومت وايي چې د ملګرو ملتو د امنیت شورا اندېښنې درک کوي، خو هڅه کوي، تر څو ټولې چارې د اسلامي شریعت په رڼا کې تنظیم کړي او د غیر شرعي اقداماتو مخه ونیسي. د ا.ا ویاند ذبیح الله مجاهد پر خپله ټویټر پاڼه لیکلي چې نړیوالو سازمانونو او هېوادونو ته په کار ده چې د افغانستان حالات او د خلکو  غوښتنې درک کړي او نړیوال بشري موضوعات او انساني مرستې له سیاسي موضوعاتو سره ونه تړي. نوموړي زیاته کړې، ا.ا په ټولو هغو برخو کې همکارۍ ته ژمن دی چې له دیني اصولو او ملي ارزښتونو سره برابر وي. د ملګرو ملتونو د امنيت شورا پرونۍ ناسته چې د افغانستان د حالاتو او د ا.ا له لوري پر ښځو د لګېدلو محدودیتونو په تړاو جوړه شوې وه، په یوه ګډه وینا پاڼه کې په افغانستان کې د نجونو او ښځو د وضعیت په اړه اندېښنه ښودلې او له ا.ا یې غوښتي چې پر ښځو لګول شوي بندیزونه ژر تر ژره لرې کړي.