افغان حکومت وايي ۲۶ نوې ولسوالۍ جوړوي

کورنیو چارو وزارت وایي، ۲۶ نوې ولسوالۍ جوړي. د یاد وزارت د مالومات له مخې، اوس د دغو نویو جوړېدونکو ولسوالیو لپاره د تشکیل پر جوړښت کار روان دی. د کورنیو چارو وزارت ویاند عبدالنافع ټکور وایي، دغه ۲۶ ولسوالۍ په ۱۲ بېلابېلو ولایتونو کې جوړیږي چې له هغې ډلې پنځه داسې ولسوالۍ هم دي چې پخواني جمهوري دولت په تشکیل کې زیاتې کړې وې او ملکي تشکیل یې ورکړی و، خو دوی به نظامي تشکیل هم ورکړي. د ټکور په وینا چې د دې پرېکړې په لاملونو کې د دغو ولسوالیو د مساحت او نفوس په ګډون د خلکو غوښتنې هم په پام کې نیول شوې. خو معلومه نه ده چې دا ولسوالۍ په کومو ولایتونو کې جوړېږي.