افغان لوری وایي په افغانستان کې د روسیې د پانګونې هرکلی کوي. د قطر دفتر ویاند سهیل شاهین په تازه څرګندونو کې ویلي چې افغانستان د پانګونې لپاره غوره او دوستانه قوانین لري او هڅه کوي بهرنۍ پانګې را جذب کړي. دده په خبره د روسیې په ګډون د ټولو هغو هېوادونو هرکلی چې په افغانستان د پرمختګ لپاره پانګونه کوي.
شاهین ټاس خبري اژانس ته ویلي چې دوی د بهرنیو پانګه والو د امنیت او هغوی ته د فرصتونو برابرولو هڅه کوي او تمه لري چې د سیمې د هېوادونو پانګه وال په افغانستان کې پانګونه وکړي.
روسيې تر دې وړاندې هم ویلي وو، چې که روسي سوداګر وغواړي نو دوی زمینه ورته برابروي چې په افغانستان کې پانګونه وکړي.
