افغان حکومت د شاه عروس بند د پاتې چارو پر بشپړولو ټینګار کړی دی. د ریاست الوزرا د لومړي معاونیت د مطبوعاتي دفتر په خپره شوې اعلامیه کې راغلي چې د ریاست الوزرا د لومړي مرستیال ملا عبدالغني برادر په مشرۍ د اقتصادي کمیسیون غونډه شوې ده. په دې غونډه کې د ګڼو نورو مسایلو تر څنګ د شاه عروس بند د اوسني وضعیت او پاتې چارو په اړه بحث شوی دی.
په دې غونډه کې ټینګار شوی چې باید ژر تر ژره د شاه عروس بند پاتې چارې بشپړې او ګټه اخیستنې ته وسپارل شي. شاه عروس بند د کابل په شکر دره کې موقعیت لري چې لوړه سلنه چارې یې بشپړې شوې دي خو په هېواد کې د وروستیو تحولاتو له امله یې ځینې چارې نیمګړې دي چې لږ کار ته اړتیا لري او تر بشپړېدو وروسته د کرنې او اوبو لګونې په برخه کې زرګونه کسانو ته ګټه رسولی شي.
