المان په کابل کې خپل سفارت بېرته پرانیزي

وروسته تر هغه چې د افغانستان ا.ا د بهرنیو چارو سرپرست مولوي امیرخان متقي وویل چې ډېر ژر به المان هم په کابل کې خپل سفارت پرانیزي د ولټ ام زونټاګ په نامه المانۍ ورځپاڼې راپور ورکړی دی چې المان هڅه کوي په نږدې راتلونکي کې په کابل کې خپل سفارت بېرته پرانیزي. راپور کې راغلي چې ډېر ژر به د افغانستان لپاره د المان سفیر ماکوس پوتزیل له طالبانو سره د ډیپلوماټیکې راشې درشي لپاره کابل ته سفر وکړي. تر اوسه پورې هیڅ هېواد د افغانستان ا.ا په رسمیت نه دی پېژندلی خو یو شمېر هېوادونو لکه المان، ایټالیا او ترکیې ویلي چې په کابل کې خپل سفارتونه پرانیزي او ډېر شمېر نورو هېوادونو بیا ویلي چې بشردوستانه مرستو ته د زمینې برابرولو لپاره له ا.ا سره په اړیکه کې دي. د یادونې ده چې په دې وروستیو کې د بریټانیا په ګډون یو شمېر نورو اروپایي هېوادونو هم ویلي چې له ا.ا سره له اړیکو پرته بله چاره نه شته.