امریکايي پوځ: نور په افغانستان کې د هوایي بریدونو معلومات نه خپروو

امریکا وايي تر دې وروسته په افغانستان کې د خپلو هوايي بریدونو په اړه معلومات نه خپروي. د امریکايي پوځ د مرکزي قومندانۍ ویاند له رسنیو سره په خبرو کې ویلي دي چې له طالبانو سره د هوکړې له مخې او په افغانستان کې د روانې جګړې د کمېدو په موخه به له دې وروسته د هوايي عملیاتو او بریدونو په اړه معلومات نه خپروي. زچاري هارل وایي دوی په دې لټه کې دي چې ژر تر ژره له طالبانو سره د سولې رامنځ ته شوې هوکړه عملي شي او په دې توګه په دغه هېواد کې روانه جګړه له سیاسي لارو حل شي. تر دې وړاندې هم امریکایي چارواکو ویلي وو چې نور به د افغان جګړې او تلفاتو په اړه معلوماتو له رسنیو سره نه شریکوي. امریکا داسې مهال دغه اقدام کوي چې طالبانو پر امریکایي ځواکونو بریدونه درولي خو له افغان حکومت سره یې جګړه روانه ده.