امریکا ته د طالبانو ګوت‌څنډنه؛ که هوکړه عملي نه کړئ، د خپلې خاورې دفاع ته دوام ورکوو

طالبانو د یوې اعلامیې په خپرولو سره په کابل کې د یو شمېر هېوادونو د سیاسي استازولیو هغې خبرپاڼې ته چې په هېواد کې یې د روانو هدفي بریدونو او عامه تاسیساتو د ورانولو پړه پر طالبانو اچولې وه غبرګون ښودلی دی. طالبانو په هدفي بریدونو او د عامه ځایونو په ورانولو کې لاس لرل رد کړي دي او ویلي یې دي چې دغه ډله د عامه ځایونو د تخریب مخنیوی خپله دنده بولي. طالبانو زیاته کړې، چې د دوی پالیسي د خبرو له لارې د افغانستان کشالې ته حل لاره موندل دي. دغې ډلې اروپایي ټولنه او یو شمېر نور هېوادونه د افغانستان په جګړه کې دخیل بللي او زیاته کړې یې ده چې دا هېوادونه اوس هم هڅه کوي چې په بېلو پلمو په افغانستان کې د امریکایي عسکرو حضور او د جګړو دوام ته لار اواره کړي. دغه راز تېره ورځ رویټرز اژانس د ناټو د څلورو مسوولینو له قوله ویلي وو چې نړیوال ځواکونه به د دوحې هوکړه کې د ټاکل شوې مودې تر پوره کېدو وروسته هم افغانستان کې پاتې شي. طالبانو د همدې موضوع او د دوحې هوکړې د نقض په تړاو امریکا ته خبرداری ورکړی دی او ویلي یې دي چې که چېرته امریکا په افغانستان کې د خپلو ځواکونو د حضور لپاره پلمې لټوي نو دوی به هم په پوره شجاعت د خپلې خاورې، ارزښتونو او خلکو دفاع ته دوام ورکړي.