امریکا پر ښځو د کار او زده کړو بندیز په اړه خپله پالیسي اعلانوي

امریکا وایي په نادولتي موسسو کې د  افغانستان د سرپرست حکومت له خوا د ښځو پر کار د لګول شویو محدودیتونو تاثیرات څیړي او ډېر ژر به په دې اړه د سپینې ماڼۍ د نوې پالیسې ځینې موارد اعلان شي. دامریکا د بهرنیو چارو وزیر انتوني بلینکن ویلي، چې امریکا د افغانستان په ګډون په ټولو هغو ځایونو کې د مېرمنو څخه ملاتړ ته ژمنه ده چې هلته یې حقونه ګواښل کیږي. بلخوا د راپورونو له مخې، د امریکا د بهرنیو چارو وزارت وایي، واشنګټن د داسې مشخصو عواقبو په څیړنه بوخت دی چې کیدای شي پر ط البانو وضع شي خو په دې اړه یې جزیات نه دي وړاندې کړي. د بهرنیو چارو وزارت ویاند نېډ پرایس ویلي، د امریکا سیاسي ځواب به محتاطانه وي، په داسې شکل چې د افغانستان د خلکو بشري وضعیت تر دې زیات له خطر سره مخ نه کړي.