امریکا یو ځل بیا له افغان حکومت د ملاتړ ډاډ ورکړی

امریکا یو ځل بیا له افغان حکومت سره د همکارۍ او تېرو لاس ته راوړنو د ساتلو ژمنه کړې ده. په کابل کې د امریکا د سفارت شارژدافیر راس ویلسن د بهرنیو چارو له وزیر حنیف اتمر سره د لیدنې پر مهال ویلي چې دوی د افغان حکومت تر څنګ ولاړ دي او خپلې اړیکې به لا پیاوړې کوي. دده په وینا اجازه نه ورکوي چې تېرې شل کلنې لاس ته راوړنې له خطر سره مخ شي. حنیف اتمر بیا ویلي چې افغانان سولې ته اړتیا لري او امریکا ته په کار ده چې په دې برخه کې خپلې همکارۍ ډېرې کړي. دده په وینا امریکا باید د افغان سولې په اړه د سیمه ییزې اجماع د پیاوړتیا لپاره لا ډېره هڅه وکړي او نړیوال دې ته تیار کړي چې په افغانستان کې له دایمي سولې سره رښتینې همکاري وکړي.