د اوکراين ولسمشر ولاديمير زلنسکي د سپينې ماڼۍ په بيضوي دفتر کې د متحدو ايالتونو له ولسمشر ډونالډ ټرمپ سره تر ترخو خبرو څو ورځې وروسته له ناچارۍ دا زده کړل چې د ټرمپ لوبه وکړي.
د اوکراين او متحدو ايالتونو د چارواکو په يوه ګډه اعلاميه کې چې په سعودي کې د دوی تر کتنې وروسته خپره شوې، ويل شوي: ”اوکراين چمتو دی چې د متحدو ايالتونو له لوري وړانديز شوی ۳۰ ورځنی موقتي اوربند ومني.“ اعلاميه کې ټينګار شوی چې متحده ايالتونه به یې په بدل کې له کيېف سره د استخباراتي معلوماتو شريکول او له اوکراين امنيتي ملاتړ بېرته پيل کړي.
د اوکراين د جګړې له پیل يا تېرو دريو کلونو راهيسې زلينسکي په تکراري ډول له متحدو ايالتونو د امنيتي تضمين غوښتنه کوي. خو ټرمپ بيا پر خپلې موخې ټينګ دی او غواړي چې له اوکراين سره د خپل هېواد ميليارده ډالره مرستې بېرته ترلاسه کړي. له دغه هېواد سره د امنيتي ملاتړ د بيا پيل اعلان هم له شک پرته يوه بيه لري. د سه شنبې ورځې په ګډه اعلاميه کې متحدو ايالتونو او اوکراين پر دې هم هوکړه کړې چې د نادرو منرالونو هوکړه به ژر تر ژره وروستۍ کړي.
دغه هوکړه تېره اونۍ د ټرمپ او زلينسکي تر ناندريو وروسته په ټپه درېدلې وه، خو د ټرمپ د يوه نوي ليدلوري پر بنسټ، د اوکراين او متحدو ايالتونو پلاويو په سعودي کې سره وکتل. له متحدو ایالتونو څخه مننې ته د اوکراين د مجبورولو پر ځای د ټرمپ پلاوي دا ځل په سعودي کې د اوکرايني پلاوي خوله له هغوی د امنيتي ملاتړ په بيا پيلولو سره خوږه کړه.
هر څه چې وي، خو د ټرمپ اداره خپلې موخې ته ځان رسول غواړي، هغه دا چې غواړي د امکان تر بريده له اوکراين سره کړې مرستې بېرته ترلاسه کړي. دوی د سولې د خبرو په پلمه د اوکراين پر طبيعي زيرمو ولکه ټينګول او پر نړۍ د متحدو ايالتونو سلطه پياوړې کول غواړي.
نادر منرالونه چې په فضايي څېړنو، سيمي کنډکټرونو، دفاعي سکټور او نورو برخو کې ورته اړتيا ده، هغه څه دي چې له څو کلونو راهيسې یې متحده ايالتونه په موندلو پسې دي. له همدې کبله ټرمپ هره وسيله کاروي چې په دې برخه کې له اوکراين سره يوې هوکړې ته ورسيږي.
دا رښتيا ده چې واشنګټن ځان د نړيوالې سولې او ازادۍ ساتونکی بولي، له همدې کبله یې په تېرو دريو کلونو کې له اوکراين سره پوځي، استخباراتي او مالي مرستې کړې دي. سره له دې هم داسې فکر کيږي چې دا هر څه د روسیې د ځپلو د وسيلې په توګه د اوکراين د کارولو هڅې وې. اوس چې اوکراين پر دې تر فشار لاندې نيول شوی چې د روسیې پر وړاندې د بريا چانس نه لري، نو واشنګټن له خپلې وسيلې د اعظمي استفادې په لټه کې دی او پر کیېف فشار راوړي چې د نادرو منرالونو د شريکولو هوکړه ورسره وروستۍ کړي.
دا هم د يادونې وړ ده چې د متحدو ايالتونو د بهرنيو چارو وزير مارکو روبيو د دوشنبې په ورځ خبرداری ورکړ چې اوکراين بايد له لاسه وتلې ځمکې د سولې د هوکړې د يوې برخې په توګه روسیې ته ور پرېږدي. که متحده ايالتونه په رښتيا هم خپلو متحدينو ته د امنيتي ضمانتونو په ورکړه کې رښتيني وای نو پر اوکراين به یې فشار نه راوړي چې له خپلو ځمکو روسیې ته ور تېر شي.
اوکراين ته په پرځېدونکي اقتصاد او ډيريدونکو تلفاتو سره نور څه ور پاتې نه دي. زلينسکي هم پرته له دې چې د ټرمپ ډول ته ونڅيږي، جګړه بنده کړي، د نادرو منرالونو هوکړه وروستۍ کړي او خپل اوسني سرحدونه ومني بل انتخاب نه لري.
واشنګټن له يوه کلک متحده نيولې بيا د سولې په خبرو کې د يوه بې پرې منځګړي په توګه له ځان غوښتنې ډک محاسبات لري. د دوی منځکړيتوب د سولې لپاره نه، بلکې په روانه جګړه کې اعظمي حد ته د خپلو ګټو د رسولو لپاره دی. متحدو ايالتونو پر اروپايي اتحادیې د وسلو او انرژۍ له پلوره د پام وړ ګټې له ترلاسه کولو وروسته اوس خپل پام د نادرو منرالونو زيرمو ته ور اړولی دی.
متحده ايالتونه به د سولې په نوم د اوکراين د جګړې تر ټولو ستر ګټونکي وي او اوکراين د شطرنج پر داسې دانې بدل شوی چې هر مهال یې له مخې د لرې کېدو امکان موجود دی.
