ایران په سوریې او عراق د امریکا بریدونه ستراتیژیکه تېروتنه بللې

د ایران بهرنیو چارو وزارت په سوریې او عراق کې د امریکا هوایي بریدونو ته غبرګون ښودلی او هغه یې د واشنګټن سټراټیژیکه تېروتنه بللې ده. رویټرز د یاد وزارت ویاند ناصر کنعاني له خولې لیکلي، چې دا چاره به ناندرۍ او بې ثباتي لا پسې ډېر کړي. د عراق بهرنیو چارو وزارت هم د یادو بریدونو په غبرګون کې هلته د امریکا سفارت چارسمبالی ورغوښتی او په یوه خبرپاڼه کې یې ویلي چې د عراق خاوره باید د جګړو ښکېلو خواوو ډګر و نه ګرځي. امریکا په سوریې او عراق کې د ایران ملاتړو ډلو پر ۸۵ ځایونو هوایي بریدونه کړي چې ۴۰ کسان یې پکې وژلي دي.