ایران په نیمروز کې د نوي ګمرک جوړولو کې مرسته کوي

د صنعت او سوداګرۍ سرپرست وزیر، د ایران د کرنې وزارت د مرستیال او د وېټرنرۍ سازمان د رییس په مشرۍ د دغه هېواد له پلاوي سره د لیدنې پر مهال په نیمروز کې د یوه نوي ګمرک پر جوړېدو خبرې کړې دي. د صنعت او سوداګرۍ وزارت ویاند اخندازده عبدالسلام جواد ویلي چې په دې لیدنه کې د دواړو هېوادونو ترمنځ د سوداګرۍ پر زیاتوالي او انډول او د کرنیزو محصولاتو لپاره د ځانګړې کرښې پر رامنځته کېدو خبرې اترې کړې دي. په ورته وخت کې د سوداګرۍ او پانګونې خونه له ایران سره د افغانستان د سوداګریزو اړیکو پراخوالی او په نیمروز ولایت کې د دواړو هېوادونو تر منځ د یوه نوي ګمرک جوړول له نورو هېوادونو سره د سرپرست حکومت د اړیکو د پراختیا لپاره ګټور ګڼي او همداراز له ایران سره په سوداګریزو چارو کې افغان سوداګرو ته د اسانتیاو د برابرېدو غوښتنه لري.