ایران کې د وړمې ورځې چاودنو کې ۱۲ افغانان هم وژل شوي

د ایران د کرمان ښار د وړمې ورځې چاودنو کې ۱۲ تنه افغانان هم وژل شوي دي. ایراني رسنیو ویلي، چې په وژل شویو کسانو کې  شپږ ښځې شاملې دي. یادې چاودنې وړمه ورځ ناوخته په کرمان کې د وژل شوي جنرال د څلورم تلین په غونډه کې شوې وې، چې له کبله یې ۹۵ تنه ووژل شول او ۲۱۱ نور ټپیان شول. دغه چاودنې، سرپرست حکومت، ملګرو ملتونو، اروپايي ټولنې، روسیې او ګڼو نورو هېوادونو غندلي او ایران سره یې خواخوږي شریکه کړې ده. ورته مهال بیا ایران اسراییل په دغو بریدونو تورن کړل او د غچ اخېستو خبره یې وکړه؛ خو امریکا د خپلې ښکېلتیا د رد ترڅنګ ویلي، چې داسې نښي نه ښکاري چې اسرائیل دې په دغو چاودنو کې دخیل وي.