ا.ا: امریکا دې زموږ په کورنیو چارو کې له لاسوهنې لاس واخلي

د افغانستان د سرپرست حکومت ویاند دامریکا سفارت د شارژدافیرې څرګندونو ته کلک غبرګون ښودلی او په ډاګه کړې يې ده، کومې موسسې چې دلته فعالیت کوي، باید قوانین او فرمانونه ومني. د نوموړي او  امریکا د شارژدافیرې کرن ډیکر ترمنځ په ټویټر کې د دا ډول تندو څرګندونو تبادله وروسته له هغه وشوه، چې وړمه ورځ د افغانستان سرپرست حکومت په نادولتي کورنیو او بهرنیو موسسو کې د ښځو پر کار کولو بندېز ولګولو. د حکومت دغه پرېکړه په پراخه نړیواله کچه وغندل شوه. د ا.ا ویاند زیاته کړې کومې مؤسسې چې په افغانستان کې فعالیت لري؛ د هېواد د قوانینو او فرمانونو په رعایت مکلفې دي. نوموړي زیاته کړې چې چاته به اجازه ورنکړي چې د بشري مرستو په نوم د ا.ا د پرېکړو یا چارواکو په اړه بې مسولیته خبرې او یا کوم ګواښ وکړي. د یادونې وړ ده چې د امریکا تر څنګ اروپايي ټولنې، ملګرو ملتونو او ګڼ شمېر هېوادونو هم موسسو کې د ښځو د کار بندیز په اړه د سرپرست حکومت وروستۍ پرېکړه غندلې ده.