ا.ا د بې ګناه زندانیانو معلومولو لپاره پلاوی ټاکلی

د افغانستان ا.ا د ویاند مرستیال انعام الله سمنګاني ویلي چې نن د کابینې په غونډه کې یو پلاوي ته دنده سپارل شوې ده چې د زندانونو څېړنه وکړي. د نوموړي په خبره، یاد پلاوی به د ا.ا په زندانونو او توقیف خونو کې د هغو کسانو څېړنه وکړي چې بې ګناه نیول شوي او په زندانونو کې پراته دي. سمنګاني زیاته کړې ده چې د یاد پلاوي مشري د سترې محکمې مرستیال عبدالمالک کوي او دغه پلاوی به د دې صلاحیت ولري چې د بې ګناه زندانیانو د خلاصون په اړه بېړنۍ پرېکړه وکړي. د یادونې ده چې واک ته د ا.ا له رسېدو سره سم ټول زندانونه مات شول او پکې زنداني کسان ټول وتښتېدل خو اوس ویل کېږي چې هره ورځ په لسګونو کسان د بیلابیلو جرمونو په تور نیول کېږي او زندانونو ته اچول کېږي.