ا.ا : له پاکستاني حکومت او ټي‌ټي‌پي څخه د یوبل زغملو هیله لرو

د افغانستان ا.ا په کابل کې د پاکستاني حکومت او پاکستاني طالبانو ترمنځ د مذاکراتو ترسره کېدل تایید کړي دي. د ا.ا مرکزي ویاند ذبیح الله مجاهد پر خپل ټویټر لیکلي چې د پاکستان حکومت او د پاکستان د طالبانو د تحریک تر منځ د ا.ا په منځګړیتوب په کابل کې مذاکرات ترسره شوي دي. نوموړي زیاته کړې ده چې د مذاکراتو په جریان کې په اړوندو موضوعاتو کې د پام وړ پرمختګ ترڅنګ په لنډمهاله اوربند هم توافق شوی دی. مجاهد څرګنده کړې ده چې د افغانستان ا.ا د خیر غوښتني په نیت کوښښ کوي چې د مذاکراتو لړۍ په بریالي شکل پرمخ ولاړه شي او له دواړو طرفونو څخه د یو او بل د زغملو او انعطاف هیله کوي. د یادونې ده چې پرون داسې راپورونه ورکړل شوي وو چې د پاکستان د استخباراتي ادارې پخوانی رییس فیض حمید له پاکستاني طالبانو سره د خبرو لپاره کابل ته راغلی دی.