بریتانیا: که ترهګري وده وکړي، بیا نظامي اقدام کوو

د بریتانیا د دفاع وزیر ویلي چې که چېرته د بهرنیو ځواکونو تر وتلو وروسته په افغانستان کې ترهګري وده وکړي نو دوی او متحدین به یې بیا هم نظامي اقدام وکړي. جېمز هپي ویلي، هڅې روانې دي چې طالبان د خبرو اترو له لارې د افغان حکومت برخه وګرځي او ټینګار یې کړی دی چې بریتانیا او ملګري هېوادونه یې دا انتخاب لري چې که چېرته ترهګري وده وکړي نو دوی به یو ځل بیا پوځي اقدام وکړي. هغه دغه راز زیاته کړې چې دوی به د افغان ځواکونو هوایي ملاتړ ته هم دوام ورکړي. د یادونې ده چې بریتانیا اوسمهال په افغانستان کې ۷۵۰ سرتېري لري چې د غوڅ ملاتړ ماموریت په چوکاټ کې د افغان ځواکونو پر روزنه بوخت دي، خو ټاکل شوې چې د سپټمبر میاشتې تر ۱۱مې له افغانستان څخه ووځي.