بلخ کې یوې مېرمنې ۱۰۰ نورو ښځو ته د کار زمینه برابره کړې ده

بلخ کې یوې مېرمنې په خپل شخصي لګښت د غالۍ اوبدنې کارخونه پرانېستې چې له زده کړو بې برخې سل نجونې په کې کار کوي. د دغې کارخونې مسووله فرشته غلامي وایي، د کارخونې له جوړېدو یې موخه دا وه چې له زده کړو محرومو نجونو ته د کار سربېره، د غالۍ اوبدلو کسب ور زده کړي؛ خو هغه څه چې یاده مېرمن یې اندېښمنه کړې د بازار نشت او د افغانۍ غالیو قاچاق کول دي چې په نړیوال بازار کې د نورو هېوادونو په نوم پلورل کېږي. په یادې کارخونې کې په کار بوختې نجونې وايي، سره له دې چې د کار زمینه ورته برابره شوې، خو د نیمګړو زده کړو بشپړول یې په زړه لوی آرمان دی، یو شمېر نجونې چې په دې کارګاه کې کار کوي، زیاتره یې په لسم او یولسم ټولګیو کې له زده کړو محرومې شوي دي.