بهرنیو چارو وزارت؛ اسلام اباد کې د افغان سفیر د لور تښتول کېدل غندلي

اسلام اباد کې د افغان سفیر د لور تښتول کېدو ته د افغانستان بهرنیو چارو وزارت غبرګون ښودلی دی. یاد وزارت د یوې اعلامیې په خپرولو سره پر یاده پېښه ژوره خواشیني څرګنده کړې او دا پېښه یې په کلکو ټکو غندلې ده. اعلامیه کې له یاد هېواد څخه په کلکه غوښتنه شوې ده چې دا پېښه په جدي توګه وڅېړي، عاملین دې ژر تر ژره پیدا او د قانون منګولو ته دې یې وسپاري. د ویلو ده چې په پاکستان کې د افغان سفیر لور سلسله علي‌خیل د سرطان میاشتې په ۲۵مه کور ته د ستنېدو پر مهال د نامعلومو کسانو له لوري وتښتول شوه. علي‌خېل د تښتوونکو له لوري سخته ربړول شوې او اوس مهال تر صحي مراقبت لاندې ده.