د پاکستان او هند ترمنځ د نوو ناندریو په دوام، تازه پاکستان ادعا کړې چې هند له افغان خاورې په استفادې په پاکستان کې ترهګریز فعالیتونه ترسره کوي. پاکستان ادعا کوي چې هندي استخبارات او د هند حکومت په پاکستان کې د ټولو ترهګریزو او ورانکارو ډلو تر شا ولاړ دی او هدف یې دا دی چې په دغه هېواد کې ورانکاري وکړي. دې مسئلې د افغان حکومت غبرګون هم پارولی دی. د افغانستان د بهرنیو چارو وزارت په یوه خپره کړې اعلامیه کې د پاکستان ادعا بې بنسټه بللې ده. افغان حکومت بیا د دې مسئلې د څېړلو لپاره د یوه نړیوال پلاوي د تشکیل غوښتنه کړې ده.
سره له دې چې له کلونو راهیسې په افغانستان کې د هند او پاکستان پر نیابتي جګړې نیوکې کېږي، خو اوس پاکستان یو ځل بیا ادعا کړې چې هند له افغان خاورې په استفادې په پاکستان کې ورانکاري فعالیتونه ترسره کوي. وړمه ورځ د پاکستان د بهرنیو چارو وزیر محمود قریشي د پاکستان د پوځ له ویاند سره یو ځای یو خبري کنفرانس درلود. د پاکستان د بهرنیو چارو وزیر وایي چې په پاکستان کې د ډېری ورانکاره فعالیتونو تر شا د هند لاس دی. د ده په خبره، دوی داسې کره اسناد او ثبوتونو موندلي چې د دې ادعا د ثابتولو لپاره یې کارولی شي او په دې تړاو ټول شکونه له منځه وړي. محمود قریشي ادعا کړې چې هند د افغانستان له لارې په پاکستان کې د جماعت الاحرار، د پاکستاني طالبانو تحریک او بلوڅ بېلتونپالو له غورځنګونو او فعالیتونو ملاتړ کوي. د قریشي په خبره، هند د زرګونو پاکستانیانو وینې تویې کړې او د ترهګرو ډلو ستر ملاتړی دی.
بلخوا افغان حکومت بیا د پاکستان دغه ادعا په بشپړه توګه رد کړې او هغه یې بې بنسټه بللې ده. د افغانستان د بهرنیو چارو وزارت د پاکستان د بهرنیو چارو وزیر څرګندونې غیر معقولې او بې اساسه بللي او په خبره یې، افغان حکومت هېڅ وخت هېڅ ډلې ته اجازه نه ورکوي چې د ګاونډیو هېوادونو پر وړاندې یې ورانکاره فعالیتونه ترسره کړي. د بهرنیو چارو وزارت په اعلامیه کې راغلي، د افغانستان د حکومت پالیسي داسې نه ده چې افغان خاوره دې د بل هېواد پر ضد وکارول شي. په اعلامیه کې راځي چې افغانستان د ترهګرۍ ضد جګړې په لومړۍ کرښه کې دی، د دې جګړې ستر قرباني دی او د نړۍ په ګوټ ګوټ کې د هر ډول ترهګرۍ پر وړاندې پر مبارزه ټینګار کوي.
د هېواد د بهرنیو چارو وزارت همدا راز د پاکستان د بې بنسټه ادعاوو د ثابتولو لپاره د ملګرو ملتونو او امنیت شورا د یوه نړیوال، بې طرفه او لوړپوړي پلاوي د جوړېدو غوښتنه کړې ده. سرچینه کاږي چې دغه نړیوال با صلاحیته پلاوی باید راشي په افغانستان کې د ټولو ترهګریزو پېښو اصلي جرړې پیدا کړي او تر هغه وروسته دې نړیوالو ته واضح کړي چې څوک په سیمه کې د ترهګرو ډلو او ترهګرۍ ملاتړي دي. د بهرنیو چارو وزارت په ډاګه دا نه دي ویلي چې پاکستان په افغانستان کې د ترهګرو ډلو ملاتړی دی، خو تر دې وړاندې په افغان حکومت کې ګڼو چارواکو په ځلونو پاکستان په افغانستان کې د ترهګرو ډلو پر ملاتړ تورن کړی دی. د بهرنیو چارو وزارت په اعلامیه کې راځي: «د حقایقو د روښانه کېدو په موخه دې د ملګرو ملتونو د امنیت شورا له خوا د دې سازمان د عمومي غوډې او امنیت شورا د پرېکړه لیکونو پر بنسټ، د ترهګرۍ پر وړاندې مبارزې لپاره یو نړیوال باصلاحیته پلاوی وټاکل شي، څو د افغانستان په خاوره کې د بریدونو او ترهګرۍ عاملین تشخیص کړي او د پاکستان دولت ادعاوې هم په جدي او مسوولانه توګه وڅېړي».
بلخوا په افغانستان کې سیاسي جریانونه او په ټولنیزو رسنیو کې فعال کاروونکي بیا هند او پاکستان دواړه په افغانستان کې د روانې ناخوالې او اوږدې جګړې ملاتړي بولي. دوی وایي چې پاکستان او هند په افغانستان کې د یو بل د ځپلو لپاره نیابتي جګړه روانه کړې؛ ځکه پاکستان په ځلونو د افغانستان د سوله د کشمیر له مسئلې سره تړلې ده او هند بیا له دې وېره لري چې په افغانستان کې د پاکستان نفوذ به د هند ګټو ته زیان ورسوي. افغان سیاسي فعالین پر حکومت غږ کوي چې خپل دریځ دې لا پیاوړی کړي او د نیابتي جګړې دغه ملاتړي هېوادونه دې په افغانستان کې له لاسوهنې منع کړي.
