بېزنېس انسایډر: امریکا د افغانستان جګړه بایللې ځکه خپل سرتیري وباسي

په دې وروستیو کې امریکايي چارواکي له افغانستان څخه د خپلو ځواکونو وتلو په اړه بېلابېلې څرګندونې کوي. د امریکا ولسمشر ډونالډ ټرمپ په بېړه له افغانستان څخه د خپلو ځواکونو وتلو خبر ورکوي، خو پوځي چارواکي وايي چې د ځواکونو ایستلو برخه کې بېړه نه لري. بېزنېس انسایډر امریکايي وېبپاڼه چې د سیاسي او اقتصادي مسایلو په اړه لیکنې خپروي د افغانستان په اړه په یوه خپاره کړي راپور کې ویلي، چې امریکا د افغانستان جګړه بایللې ده. د طالبانو او امریکا تر منځ د هوکړې په اساس متحده ایالات وضعیت ته په کتو له افغانستان څخه خپل سرتیري تر راتلونکي ۲۰۲۱ کال پورې په بشپړ ډول وباسي. د راپور له مخې امریکايي پوځي چارواکو ټرمپ ته د جګړې ختمولو په برخه کې پنځه انتخابونه وړاندې کړي خو په بېړه د ځواکونو وتل وحشتناک یاد شوي دي. بېزنېس انسایډر لیکلي چې امریکا د افغانستان جګړه بایللې ده او وې نشو کړای چې طالبانو ته ماتې ورکړي.