تېرو ۸ میاشتو کې د ۱۴ میلیونه ډالرو په ارزښت جلغوزي صادر شوي

د صنعت او سوداګرۍ وزارت وايي، د روان لمریز کال په تېرو ۸ میاشتو کې بهر ته د ۱۴ میلیونه ډالرو په ارزښت جلغوزي صادر شوي دي. د دغه وزارت ویاند وايي، هڅه کوي، چې د هوايي دهلېزونو او ځمکې له لارې د جلغوزیو د صادراتو په برخو کې لا زیاتې اسانتیاوې برابرې کړي. یو شمېر سوداګر بیا وايي، بهر ته د جلغوزیو د صادراتو د زیاتوالي لپاره اړتیا ده، چې سرپرست حکومت د سوداګرو ستونزو ته هم رسېدنه وکړي او د جلغوزیو پروسس په کور دننه وشي. د سوداګرۍ او پانګونې خونه بیا وايي، افغانستان په کال کې د ۱۰۰ میلیونه ډالرو په ارزښت د جلغوزیو د صادراتو ظرفیت لري او باید په دې برخه کې جدي پام وشي. د صنعت او سوداګرۍ وزارت د ورکړل شویو معلوماتو له مخې په ۱۴۰۱ هجري لمریز کال کې د ۴۹ میلیونه ډالرو په ارزښت جلغوزي بهر ته صادر شوي، چې ډېری صادرات یې پاکستان، چین او هند ته شوي دي.