تېرو ۸ میاشو کې د ۲۷ میلیونه ډالرو په ارزښت زعفران صادر شوي

د صنعت او سوداګرۍ وزارت وايي، افغانستان په تېرو ۸ میاشو کې د ۲۷ میلیونه ډالرو په ارزښت زعفران بهر ته صادر کړي دي. د دغه وزارت ویاند وايي، صادر شوي زعفران ۲۸ زره کیلو ګرامه وو او بېلابېلو هېوادونو ته صادر شوي دي. د زعفرانو صادروونکي د سرپرست حکومت له چارواکو غوښتي، چې د هوايي دهلېزونو له لارې بهرنیو هېوادونو ته د زعفران د لېږد لپاره لا ډېرې اسانتیاوې برابرې کړي. بل پلو د سوداګرۍ او پانګونې خونه وايي، چې سربېره پر دې چې د تېر حکومت په پرتله په نړیوال بازار کې د زعفرانو بیه لوړه شوې د دغه محصول تولید هم په هېواد کې پراخ شوی دی. د کرنې اوبو لګونې او مالدارۍ وزارت د معلوماتو له مخې، په هېواد کې د زعفرانو د کرکېلې د ودې په موخه ۲۰۰ کروندګرو ته روزنه ورکړل شوې څو وکولی شي، په نورو ولایتونو کې هم د زعفرانو کرکیلې ته پراختیا ورکړي.