تېرو ۹ میاشتو کې د طبیعي پېښو له امله ۸۵۰ کسانو ته مرګ‌ژوبله اوښتې

پېښو ته د رسېدو په چارو کې د دولت وزارت ویاند وايي، په تېرو ۹ میاشتو کې په هېواد کې په طبیعي پېښو کې ۳۵۰ کسانو ژوند بایللی او ۵۰۰ نور ټپیان شوې دي. نوموړی زیاتوي، د دې پېښو په پایله کې ۴ زره کورونه په بشپړ او نیمه ډول ویجاړ شوي او ۷۰ زره جریبه ځمکه هم ویجاړه شوې ده. د دغه وزارت د ویاند په خبره، په سږني کال کې د هېواد ۲۵ بېلابېل ولایتونه د سېلابونو او نورو ګواښونو سره مخ دي. د دغه وزارت ویاند زیاتوي هغه ولایتونه چې له ګواښ سره مخ دي، بدخشان، بامیان، بلخ، سمنګان، تخار، کندهار او ځیني نور ولایتونه دي. ورته مهال ځينې هېوادوال، چې په هېواد کې د وچکالۍ او طبیعي پېښو له امله اغېزمن شوي، د وچکالۍ د زیاتېدو په اړه اندېښنه څرګندوي. دوی وايي، سږ کال وچکالۍ په هېواد کې کروندګرو ته ډېر زیانونه اړولي دي.