تېر ۲۴ ساعته؛ هېواد کې د کرونا ۱۸۲۲ نورې مثبتې پېښې ثبت شوې

روغتیا وزارت وایي چې په تېرو ۲۴ ساعتونو کې په هېواد کې د کرونا وبا ۱۸۲۲ نورې مثبتې پېښې ثبت شوې دي. د یاد وزارت په خبره، په همدې موده کې پر کرونا اخته ۵۶ کسان مړه شوي او ۴۰۹ نور بیا بېرته روغ شوي دي. د روغتیا وزارت د وروستیو معلوماتو له مخې، تر اوسه په هېواد کې پر کرونا د اخته کسانو ټول شمېر ۸۷ زره او ۷۱۶ ته او د مړه شویو هغه بیا ۳۴۱۲ ته لوړ شوی دی. د یادونې ده چې تېره ورځ د روغتیا وزارت سرپرست وحید مجروح ویلي وو چې ښایي په راتلونکو اوونیو کې کرونا وبا لا پراختیا ومومي، نو هېوادوال دې د دغه ویروس د دریېمې او خطرناکې څپې پراختیا مخنیوي لپاره روغتیایي سپارښتنو ته جدي پاملرنه وکړي.