جاپان: له افغانستان سره خپلو مرستو ته دوام ورکوو

د اقتصاد سرپرست سرپرست وزیر، په کابل کې د جاپان له سفیر تاکایوشي کورومایا سره کتلي دي. د اقتصاد وزارت په خپره شوې خبرپاڼه کې راغلي چې په دې کتنه کې، دواړو لورو د اقتصادي همکارۍ د ښه والي او د بشري مرستو د اغېزمنتوب او دوام په اړه خبرې کړې دي. د جاپان سفیر، په ۲۰۲۴ میلادي کال کې د دغه هېواد د شاوخوا ۲۷.۴ میلیونه ډالرو بشري مرستو په اړه مالومات ورکړي چې په افغانستان کې د ملګرو ملتو سازمان اړوندو ادارو له لارې په بېلابېلو برخو کې پلې شوې دي. هغه، په ۲۰۲۵ میلادي کال کې له افغانستان سره د روغتیا، تعلیم، له نشه يي توکو سره د مبارزې، بدیل معیشت، د اوبو مدیریت، له اقلیم بدلون سره د مبارزې او د بېځایه شویو او راستنېدونکو ستونزو د حل په برخو کې د خپل هېواد د پراختیايي او بشري مرستو د دوام ډاډ ورکړی دی.