آلمان د لسګونه افغان ماشومانو درملنه کوي

د آلمان د سولې کلي په نوم د یوه خیریه بنسټ پلاوی د راتلونکې چهارشنبې په ورځ افغانستان ته راځي ترڅو هغه ماشومان په نښه کړي چې درملنه به یې په آلمان کې کېږي. دا خبره د سرې مياشتې ټولنې ویاند عرفان الله شرفزوی کړې او ویلي یې دي چې په آلمان کې د درملنې لپاره هغه ماشومان غوره کېږي چې په اور سخت سوځېدلي یا یې هډوکي مات شوي او په هېواد کې دننه یې درملنه ستونزمنه ده. شرفزوی ویلي، چې د دغو ماشومانو د پاسپورټ او ویزې په ګډون نور ټول لګښتونه به د سرې میاشتې ټولنې په غاړه وي او په آلمان کې درملنه به یې د آلمان د سولې کلي بنسټ په وړیا توګه کوي. د افغاني سرې میاشتې ټولنې ویاند همدارنګه ویلي، په هره دوره کې له پنځوسو نه تر سلو پورې ماشومان د درملنې لپاره آلمان ته بېول کېږي او درملنه یې شپږ میاشتې وخت نیسي.