جرمني له افغانستان سره ۹۰ میلیونه یورو مرسته کوي

د افغانستان لپاره د جرمني سفارت ویلي، جرمني له افغانستان سره ۹۰ مېلیونه یورو مرسته کوي. دې سفارت پر خپل ټویټر لیکلي، دغه مرستې به د خوړو نړیوال پروګرام او په افغانستان کې د ملګرو ملتونو د پراختیايي پروګرام له لارې ولګول شي. له څه باندې یو کال راهیسې افغانستان ته څه باندې ۱ نیم میلیارده ډالره راغلي؛ خو یو شمېر هېوادوال وايي چې، له دغو مرستو لا هم نه دي برخمن شوي او د دغو مرستو د وېشني پر څرنګوالي نیوکې لري. اقتصاد وزارت بیا ډاډ ورکوي چې د نړیوالو پر مرستو څارنه لري او په وینا یې ډېری دغه مرستې د طبیعي پېښو له امله پر زیانمنو ویشل شوي دي. تر دې مخکې د سره صلیب اجراییه رئیس ویلي، په افغانستان کې ۲۴ میلیونه کسان بشري مرستو ته اړتیا لري او په وینا یې د مرستو په پرې کېدو سره به په دغه هېواد کې اقتصادي وضعیت لاپسې خراب شي.