جواد ظریف: اوس هم دوه زره افغانان زموږ په قومانده سوریه کې جنګېږي

ایران وایي لا هم په سوریه کې دوه زره افغانان ددوی تر ملاتړ لاندې جګړه کوي. د ایران د بهرنیو چارو وزیر له طلوع نیوز سره په مرکه کې ویلي چې دغه افغانان په خپله خوښه جګړې ته تللي دي خو ایران یې په بشپړه توګه ملاتړ کوي. ظریف همدا راز ویلي چې له افغانستان د امریکایي ځواکونو د وتلو پلویان دي خو دغه وتل باید مسوولانه وي. ظریف دا هم ویلي چې افغان حکومت کولی شي په سوریه کې له جنګېدلو افغانانو دداعش ډلې پر وړاندې استفاده وکړي او دغه راز هغه د پوځ په لیکو کې جذب کړي. تر دې بیا یوه ورځ وړاندې د نړیوالو مسایلو څارونکي ایراني پروفیسور په امریکا کې رسنیو ته ویلي وو چې افغان حکومت دې هېڅکله دا تېروتنه نه کوي، ځکه دغه جنګیالي د ایران تر بشپړ نفوذ لاندې دي او په افغان پوځ کې ګڼې ستونزې پیدا کولی شي.