جېسوال: له مولوي امیر خان متقي یې تود هر کلی کړی دی

د هند د بهرنیو چارو وزارت ویاند رندیر جېسوال پر خپله اېکس پاڼه په یوه لیکلي بیان کې ویلي، چې د مولوي امیرخان متقي یې تود هرکلی کړی دی. نوموړي زیاته کړې، (موږ د دوه اړخیزو اړیکو او سیمه‌ییزو مسلو په اړه له هغه سره د خبرو اترو په تمه یو.) که څه هم د هند د بهرنیو چارو وزارت ویاند په دې اړه زیات جزییات نه‌دي ورکړي؛ خو د راپورونو پربنسټ د افغانستان د بهرنیو چارو وزیر امیر خان متقي به نن له لوړپوړو هندي چارواکو سره وګوري. د بهرنیو چارو وزارت وړاندې ویلي و، چې امیرخان متقي له مسکو وروسته د هند د بهرنیو چارو وزیر په رسمي بلنه نوي ډیلي ته سفر کړی دی.