دفاع وزارت وايي۷۰ الوتکې یې ترمیم کړي دي

دفاع وزارت وايي، د هوايي ځواک تخنیکي عملې او متخصصانو ۷۰ الوتکې او څرخکې ترمیم کړي دي. د دفاع وزارت ویاند عنایت الله خوارزمي د ترکیې انادولو خبري اژانس ته ویلي، دا الوتکې او څرخکې د ۲۰۲۱ کال په اګست میاشت کې امریکايي پوځیانو له افغانستانه تر وتلو مخکې ویجاړې یا زیانمنې کړې وې. نوموړي ویلي چې دا الوتکې او څرخکې اوس الوت ته چمتو دي او د افغانستان هوايي ځواک ورڅخه کار اخلي. خوارزمي په عین حال کې ویلي، کله چې دوی د تېر کال په اګست کې کابل ونیوه، هېڅ الوتکه او څرخکه روغه نه وه او هېڅ یوې الوتنه نشوای کولی. خوارزمي دغه راز ویلي، چې د ا.ا په غوښتنه ۴۰ پېلوټان بېرته خپل هېواد ته راستانه شوي او د زیانمنو شویو الوتکو په ترمیم کې یې مرسته کړې ده.