د شانګهای همکارۍ سازمان د دفاع وزیرانو غونډه د اپرېل په ۲۸مې نېټې د قرغېزستان په پلازمېنې بشکېک کې ترسره شوه.
په دغه غونډه کې د چین د دفاع وزیر دونګ جون د چیني پلاوي په مشرۍ ګډون او وینا کړې ده.
نوموړي په خپله وینا کې د رئیس شي جين پينګ د نړیوال پرمختګ، نړیوال امنیت، نړیوال تمدن او نړیوالې حکومتولۍ څو وړاندېزونو ته اشاره کړې او د هغه دغه نوښتونه يې د ناکرارې نړۍ لپاره ارزښتناک بللي دي او په خبره یې، ياد وړانديزونه به نړۍ ته ارامي او ثبات ورسوي.
دونګ جون ويلي، د شانګهای همکارۍ سازمان غړي هېوادونه دې د دې سازمان د جوړېدو د ۲۵مې کلیزې په پار دفاعي او امنیتي همکارۍ ژورې او چارو ته دې وده ورکړي او د لوړ کیفیت پرمختګ لپاره دې متحد، همکار، متحرک او اغېزمن واوسي.
په دې غونډه کې د بېلا بېلو هېوادونو دفاع وزیرانو د ستراتیژیکو اړیکو او عملي همکاريو د پیاوړتیا او د سیمه ییزې سولې او ارامۍ د ساتلو ژمنې کړې دي.
