دیني عالمان: حکومت او طالبان؛ د خپلو ګټو لپاره اوربند او سولې ته زړه نه ښه کوي

په بغلان ولایت کې دیني عالمانو د یوې غونډې پر مهال دوحه کې له ښکېلو خواوو د اوربند د ټینګښت غوښتنه وکړه. دیني عالمانو د یوې غونډې پر مهال ویلي، چې د بین الافغاني خبرو پر پيل کېدو سره هېواد کې د جګړې شدت هم زیات شوی او زیاتوي چې هم طالبان او هم حکومت د خپلو شخصي ګټو د دوام لپاره اوربند او سولې ته زړه نه ښه کوي. دیني عالمان نیوکه کوي، چې د جګړې دواړه اړخونه د ملت په سترګو کې خاورې اچوي او خپلو شخصي ګټو ته د رسېدو په هدف خپله هغه جګړه اوږدوي چې، قرباني ولس ورکوي او عام خلک د دروغو په ژمنو تېر باسي. دینې عالمان وايي، چې د سولې مذاکراتي پلاوي دې د قرآن او سنتو په رڼا کې د سولې روانې خبرې مخته یوسي. د دیني عالمانو دا غوښتنې داسې مهال دي چې قطر کې لا هم د بین الافغاني مذاکراتو د طرزالعمل پر سر دواړه لوري توافق ته نه دي رسیدلي او په هېواد کې جګړو زور اخیستی.