د ازبکستان لوړپوړی سوداګریز پلاوی کابل ته راورسېد

د افغانستان د سوداګرۍ او پانګونې خونې ویلي، د ازبکستان یو لوړپوړی پلاوی د دغه هېواد د لومړي وزیر د مرستیال، جمشید خواجه‌یوف، په مشرۍ نن کابل ته راورسېد. د یادې خونې د مسوولینو په وینا، دا پلاوی له ۱۷۰ ازبک سوداګرو او پانګوالو څخه جوړ دی او ټاکل شوې چې د افغانستان د سوداګرۍ او پانګونې خونې له مسوولینو او د ا.ا له یو شمېر چارواکو سره لیدنې او خبرې وکړي. د افغانستان د سوداګرۍ او پانګونې خونې زیاته کړې چې د دغو لیدنو اصلي محور به د دواړو هېوادونو ترمنځ د سوداګرۍ، ټرانزیټ، پانګونې او اقتصادي همکاریو پراختیا او پیاوړتیا وي.