د استرالیا لومړی وزیر: د استرالیايي ځواکونو پر ماموریت د ټولو ادعاوو جدي پلټنه روانه ده

استرالیا وایي په افغانستان کې یې د ځانګړو ځواکونو پر نظامي مامورت ټولې شوې ادعاوې او تورونه څېړي. د استرالیا لومړي وزیر په یوه خبري غونډه کې د خبرو پر مهال ویلي چې خپلو هېوادوالو ته دردوونکی خبر لري. سکاټ موریسن ویلي له بده مرغه معلومات او د څېړنو پایلې ښيي چې استرالیايي ځواکونو په افغانستان کې داسې فعالیتونه ترسره کړي چې له قوانینو سره په ټکر کې دي او د استرالیا عدلي او قضايي ارګانونه یې په اړه د پرېکړې کولو پوره صلاحیت لري. سکاټ مورېسن وایي دوی په دې توګه غواړي د استرالیا په پوځ کې حاکم فرهنګ بدل کړي او ټولې اړوندې قضیې وڅېړي. په دې وروستیو کې په نړیوالو رسنیو کې ګڼ راپورونه خپاره شوي چې استرالیایي ځواکونو په افغانستان کې د ۲۰۰۵ او ۲۰۱۶ کلونو ترمنځ سخت بشري او جنګي جنایتونه ترسره کړي دي. د استراليايي رسنیو د راپورونو له مخې تر اوسه ۵۵ دغه ډول قضیې څېړل شوې دي چې ۳۳۶ کسانو پر دې پېښو شاهدي ورکړې ده. ویل کېږي چې استرالیايي ځواکونو د خپل ماموریت پر مهال ملکي وګړي په قصدي توګه په نښه کړي، شکنجه کړي او ان تر شکنجو لاندې یې عام افغانان وژلي دي. دغه هېواد اوس هم په افغانستان کې د ۴۰۰ په شاوخوا کې سرتېري لري.